Starfsemi stéttarfélaga í dag er að verða býsna flókin einfaldlega vegna þess að samfélagið okkar verður sífellt flóknara. Alþingi er allt að því daglega að setja ný lög eða að breyta þeim sem fyrir eru. Öll þessi lagasetning hefur áhrif á líf borgaranna og um leið á starfsemi stéttarfélaga. Það segir sig sjálft að þeir starfsmenn stéttarfélaga sem vilja láta taka sig alvarlega verða að kynna sér þau lög og þær breytingar á eldri lögum sem bæði beint og óbeint varða störf þeirra og starfsemi. Þess utan eru mörg þingmál þess efnis að þau snerta ákveðna hópa innan VM alveg sérstaklega. Þar má nefna lög um stjórn fiskveiða sem hafa bein áhrif á kjör sjómanna og þá um leið á kjör vélstjóra fiskiskipa. Lög um iðnmenntun sem hafa bein áhrif á störf og starfskjör iðnaðarmanna almennt og síðast en alls ekki síst má nefna lög um atvinnuréttindi vélstjóra, vélfræðinga og vélavarða sem ráða á nokkurn hátt kjörum þessara manna.

Að öllu þessu skoðuðu er alveg ljóst að stéttarfélög framtíðarinnar þurfa að hafa í sinni þjónustu vel menntað starfsfólk en ekki endilega eigin félagsmenn þótt þeir séu vel menntaðir og miklir fagmenn hver á sínu sviði; það reynir ekki á þessháttar fagmennsku í störfum stéttarfélaganna nema þá að mjög litlu leyti. Stéttarfélag þarf í sínum rekstri að tryggja að tekjunum sé vel varið með hagsmuni eigandanna, félagsmannanna, að leiðarljósi.